ଆକ୍ସନ ମୋଡରେ ସରକାର; କାହିଁକି ଲାଗୁଛି ବୈଦ୍ୟୁତିକ ଯାନରେ ନିଆଁ ?

କମ୍ପାନୀ ମାନଙ୍କ ପାଇଁ ଜାରି ହେବ ଗାଇଡଲାଇନ୍‌

0

ନୂଆଦିଲ୍ଲୀ: ପେଟ୍ରୋଲ ଡିଜେଲ ଦର ବୃଦ୍ଧିକୁ ଦୃଷ୍ଟିରେ ରଖି ଗ୍ରାହକ ଏବେ ବୈଦ୍ୟୁତିକ ଯାନ ଆଡ଼କୁ ଆକର୍ଶିତ ହେଉଛନ୍ତି । ବିଭିନ୍ନ ନାମିଦାମୀ କମ୍ପାନୀ ମଧ୍ୟ ବୈଦ୍ୟୁତିକ ଯାନ ପ୍ରସ୍ତୁତ କରିବା ସହ ବଜାରକୁ ଛାଡ଼ୁଛନ୍ତି । ହେଲେ ନିକଟରେ ବୈଦ୍ୟୁତିକ ଗାଡ଼ି ଗୁଡ଼ିକ ଜଳିଯାଉଥିବା ନଜର ଆସିଲାଣି । ଗାଡ଼ିଗୁଡ଼ିକ ସୁରକ୍ଷାକୁ ନେଇ ମଧ୍ୟ ଅନେକ ପ୍ରଶ୍ନ ସୃଷ୍ଟି ହେଲାଣି । ଏହି ଘଟଣାକୁ ଦୃଷ୍ଟିରେ ରଖି ବୈଦ୍ୟୁତିକ ଗାଡ଼ି ଗୁଡ଼ିକରେ ବ୍ୟାଟେରୀ, ବ୍ୟାଟେରୀ ପରିଚାଳନା ଏବଂ ଗାଡ଼ିର ବିଭିନ୍ନ ଉପକରଣରେ ପରିବର୍ତ୍ତନ କରିବାକୁ ସରକାର କହିଛନ୍ତି ।

ଗାଡ଼ିଗୁଡ଼ିକରେ ଘଟୁଥିବା ଅଗ୍ନିକାଣ୍ଡକୁ ନେଇ ସରକାର କମ୍ପାନୀ ଗୁଡ଼ିକ ସହ ଆଲୋଚନା କରିଛନ୍ତି । ଆଗାମୀ ଦିନରେ କିପରି ଏଥିପ୍ରତି ଦୃଷ୍ଟି ଦିଆଯିବ ଏବଂ ଏହି ତ୍ରୁଟିକୁ ରୋକା ଯାଇପାରିବ ସେନେଇ ଆଲୋଚନା ହୋଇଛି । ଓଲା, ଜିତେନ୍ଦ୍ର ଇଲେକ୍ଟ୍ରିକ୍‌, ଓକନାଓ୍ୱା ପରି ବୈଦ୍ୟୁତିକ ଯାନ କମ୍ପାନୀ ଏଥିପ୍ରତି ଧ୍ୟାନ ଦେବାକୁ ସରକାର ପରାମର୍ଶ ଦେଇଛନ୍ତି ।

ବିଭିନ୍ନ ସମୟରେ ବୈଦ୍ୟୁତିକ ଯାନ ଗୁଡ଼ିକରେ ନିଆଁ ଲାଗିଯାଉଥିବା ଦେଖିବାକୁ ମିଳୁଛି । ପୂର୍ବରୁ ଅନେକ ବୈଦ୍ୟୁତିକ ଯାନ ଗୁଡ଼ିକରେ ଅଗ୍ନିକାଣ୍ଡ ଘଟିଥିବା ବେଳେ ମାର୍ଚ୍ଚ ୨୬ ତାରିଖରେ ପୁଣେର ଓଲାର ଏ୧ ପ୍ରୋ ବୈଦ୍ୟୁତିକ ସ୍କୁଟର ରାସ୍ତାକଡ଼ରେ ଛିଡ଼ା ହୋଇଥିବା ସମୟରେ ନିଆଁ ଲାଗିଯାଇଥିଲା । ଯାହାର ଭିଡିଓ ସୋସିଆଲ ମିଡିଆରେ ବେଶ ଭାଇରାଲ ହୋଇଥିଲା ।

ଏହି ସବୁ ଘଟଣାକୁ ନେଇ ସରକାର କମ୍ପାନୀ ମାନଙ୍କ ପାଇଁ ଏକ ଗାଇଡଲାଇନ୍‌ ଜାରି କରିବେ । ଗାଇଡଲାଇନ୍‌ ଅନୁଯାଇ କମ୍ପାନୀ ଗୁଡ଼ିକ ପଦକ୍ଷେପ ଗ୍ରହଣ କରିବେ ବୋଲି କୁହାଯାଇଛି ।

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More